Vie pe seconde vuere mondiâl, tant in Furlanie che in Cjargne, ta Resistence di chenti a jentrarin ancje unevore di rus, che , par solit scjampâts di preson, a sielzevin di metisi cu lis organizazions partigjanis , cjatantsi cussì a scombati cuintri dai todescs a miârs di chilometris da lôr tiere. Di chescj partigjans rus si sa pôc. Forsit l'esempli plui impuartant de lôr vore te Resistence, al è stât il dâsi dongje, dentri des formazions da "Garibaldi", di un bataion fat dibot dome di rus, vuidâts dal Comandant "Daniel", Danijl Avdveev, che al murì tun scombatiment tal 1944 e che al vignì po onorât cu la medaie di aur al valôr militâr.
Danijl Avdveev, nassût tal 1917 intun piçul paîs rus, Noviki Vologodskaja, al veve studiât te scuele militâr di Leningrât e al ere deventât uficiâl di cjavalarie de Armade Sovietiche. Tal 1942, biel che al scombateve sul front meridionâl rus cuintri de invasion naziste al vignì cjapât, fat presonîr, e mandât po tai lagers todescs (a Muhlberg dongje dal flum Elbe prin e in Baviere, a sud di Munich, po). In preson al cognossè doi oms che a varessin condividût cun lui la sô esperience cuintri dal nazisim: Alexandr Kopilkov a Muhlberg e Anton Melniciuk in Baviere. A erin sovietics che a vevin frontât esperiencis dibot compagnis. In moments difarents, i trei a rivarin adore a scjampâ dal lager e a ricjatâsi inte neutrâl Svuizare, a Zurich. Dopo cualchi setemane (si ere aromai tor la metât dal avrîl dal 1944), a deciderin di partî par lâ a unîsi ai partigjans talians che a scombatevin cuintri dal lôr stes nemî. A vevin savût che in dute la Italie dal Nort a ere scomençade la Resistence partigjane: a deciderin di lâ a scombati in Cjargne, ancje se a ere lontane. Al fo un aventurôs viaç fat a pît, par 450 luncs e periculôs chilometris, che al durà plui di un meis, e che al finì cuant che i trei a rivâts in Friûl, ai 24 di mai dal 1944 si unirin al bataion garibaldin "Matteotti"che al operave su pes monts tor dal lâc di Cjavàç. Stazadis lis lôr intenzions e lis lôr cualitâts, a vignirin acetâts adimplen de formazion partigjane e in curt a vignirin ametûts a cjapâ part a lis plui impuartantis azions, come i sabotaçs a la ferade Udin -Tarvis (impuartants chei dal 4 e dal 12 di jugn 1944)e al presidi di Fluvigne (18 di jugn). In cheste e in altris azions i rus, e in particolâr Daniel, a mostravin dute la lôr abilitât tal dropâ i esplosîfs. A vignirin cussì sabotâts il puint di Braulins (25 di jugn) e , in lui, il puint al Armistizi sul Arzin. Al nassè cussì, dentri dal bataion "Matteotti", un trop di vuastadôrs, dibot ducj rus, che al fo impegnât ancje tal atac a la polvariere di Osôf dal 25 di lui. Culì dopo vei puartât vie une sdrume di esplosîfs e materiâi, puartâts po cui geis su fin ai stâlis des tantis feminis rivadis dongje dopo dal scjas de azion partigjane, ai rus ur vignî dade le incariche di fâ saltâ la polvariere. Fat che al sucedè tra "lampadis spaventosis e tons unevore fuarts". Cul cressi po dal numar di chei che si butavin cui partigjans (ancje svareâts rus che a vevin vivude une esperience compagne di chê di Avdveev), dentri dal bataion "Matteotti" a nasserin des gnovis formazions. Fra chestis al ere il "Bataion Stalin" dât dongje pal plui di rus e clamât a la incjarie di comant al fo propit Avdveev (che al cjapà su il non di bataie di Comandant "Daniel"). A fâ di Comissari al fo "Silos" (Valentin Bobkov, un dai rus rivâts di pôc al bataion, ma che al veve mostrât subit lis sôs valencis).
Il Bataion “Stalin” al vignì doprât tal imprin soredut inte zone tra Cjavàç e Damâr, ancje par controlâ, e in cualchi câs ancje frontâ lis formazions cosachis che si davin dongje par atacâ la zone libare. Si tratave di "azions di impediment a bot e sclop vie , fatis intes oris plui impensadis, massime cuant che i cosacs a erin in moviment, par tignîju simpri in vuaite, o par rindi periculôsis lis jessudis che a fasevin tai contors par procurâsi il fen che al coventave ai lôr cetancj cjavai". Inte gnot da Madone di avost dal 1944 i partigjans garibaldins a lerin a tacâ chei cosacs che si erin incjasâts in tes scuelis di Campagnole di Glemone. Ancje in cheste azion i rus a verin une part impuartante, parcè che doi di lôr, Gamid e Bakva, si viestirin di cosacs e , fevelant par rus, a rivarin a imbroiâ e a meti fûr combatiment lis sentinelis , dant il vie al atac dai partigjans. Il comissari Tom al ricuardave cussì chel moment:" Stazadis dutis lis informazions cjapadis su des -bolps da braide-, il comant dal bataion al studià e al dè dongje un plan di atac cuintri dal fuart presidi cosac incjasât tes scuelis di Campagnole di Glemone.(…) Svelts, Gamid e Bakva, vistûts cu la monture dai cosacs, si direzerin , fevelant in rus, da bande des sentinelis che a erin di vuardie al puarton des scuelis; chestis a croderin di vei ce fâ cun doi camarâts, e si meterin a babâ insieme. Ma cuant che dopo une partide di cjacaris, a vioderin dôs pistolis che a smicjavin ai lôr pets, si inecuarzerin dal ingjan là che a erin colâts. Disarmâts e slontanâts i doi cosacs, cence un gjest né un viers, Gamid e Bakva si meterin a fâ la vuardie tal lôr puest davant dal puarton des scuelis.(…) Alore Lupo, Anton, Gufo, Tom e Strage a tacavin par daûr il trop di cosacs, che al ere ancjemò in viste, butant bombis a man e sbarant cul mitrajadôr; il nemî, meraveât e spaventât dai colps precîs sbarâts dai garibaldins, si dispierdè scjampant viers Glemone. Tal fratimp, chei altris partigjans, pojâts sul mûr di cente da scuele a tacavin a trai une slavinade di colps sei sui cjavai che a erin sierâts dentri tal grant curtîl, che sui lôr vuardeans. Intant che lis bestiis a deventàvin matis e a colàvin tal polvar e tes bujacis, tune tampieste di zucui, di sclops di molotovs e di bombis, tiradis cun fiondons manovrâts unevore ben di Semen, Fiore, e Alexandr, il tîr des armis si alçave po a trai ai barcons da scuele, di indulà che si ere metût a trai il nemî.
Lu atàc furiôs, che al puartà il nemî a vei ,tra ferîts e muarts, svareadis desenis di oms metûts fûr combatiment e un cinquantine di cjavai copâts, nol durà plui di une desene di minûts; al smetè a colp cuant che Furore al molà par segnâl une fusète che a obleà ducj al cidin e po a ritirâsi dal moment”.
Tal meis di otubar - sul scomençâ da pesande ofensive nazifasciste che a vares parât a tocs le organizazion partigjane e viertis lis puartis a la ocupazion cosache - il Batalion al vignì spostât te val dal Arzin. I partigjans dal "Stalin" a vignirin alore inschirâts a presidiâ chê part da val dal Arzin jenfre la jentrade da Val di Preon e lis alturis da Mont di Prât di Forgjarie. I partigjans a provàrin a resisti par svareadis zornadis ai atacs dai nazifassiscj. La sere dal 19 di utubar 1944 (des ricercjis fatis di resint nus mostrin che chescj fats a son sucedûts vie par cheste gnot, e no te gnot dal 11 di novembre come che si veve simpri contât..) Daniel al jessì a cjaval di San Francesc par viodi di ce bande che a podèvin passâ lis trupis dal nemî e cemût fermâlis. Al ere in vuaite par vie da muart di un partigjan polac dal "Stalin", copât tant che al ere di sentinèle te jentrade dal paîs. Al vignì però lumât e colpît di une svintule di mitrae. Colât di cjaval, si strissinà cun fadie fint a rivâ dongje di un tombin in bande da strade, dulà che al spirà. Cualchi dì dopo, ai 22 di utubar, cun chê di organizâ miôr lis operazions di resistence al atac, al vignì metût su il Bataion"Martiri di Belfiore", cui talians che a erin dentri dal "Stalin": di inchevolte tal Bataion "Stalin" a restarin dome sovietics.
Daniel al vignì cjatât dome unevore di dîs daspò, dongje di un tombin in bande da strade: il so cuarp al vignì cjapât su e sepulît fûr dal cimiteri di Clausêt. Doi compagns di lote, il rus Silos e il furlan Tom (Leonardo Picco) a fasèrin le orazion di muart, e Anton Melniciuk cun Alexandr Kopilkov a dèrin l'onôr des armis al amî copât.
Dopo da muart di Daniel, il Bataion al passà par une crisi unevore fonde: i combatiments, lis pierditis, lis feridis, e lis malatiis a vevin ridot il numar dai combatents di 120 a 50, e ancjemò restâts cence di un comandant che a vevin amât e stimât. Ce che al ere restât dal Bataion "Stalin" al vignì mandât a Maleòn, un borc de Val di Tramonç sot di chê part da Mont di Rest che a cjale a miesdì. Culì al vignì elet il gnûf comandant, Alexej Silos al vignì invessit al vignì rielet te incariche di comissari politic). Lis batudis a ristiel a vignìvin une daûr di chealtre: te cjasere Cjamps, su la mont Frascola, il Bataion al vignì di gnûf atacât e al patì altris pierditis. Al fo inchevolte che Anton e Alexandr, comandants di un trop che vie pe batude al veve pierdût ogni contat cul rest dal Bataion, a deciderin di lassâ il Friûl par tornâ in Svuizare. Cussì dopo un viaç a pît par doi meis a rivarin tal fevrâr dal 1945, a passâ la frontiere svuizare.
I rescj dal Bataion Stalin, si stramudàrin te zone di Fors di Sôre, dulà che a restàrin par cualchi timp cjatant sotet ta chei stâlis sore dal paîs judâts (soredut in mangjative) dai partigjans cjargnei e da popolazion. Tal meis di març il Bataion al vignì mandât in Val Pesarine. A Pasche, i partigjans sovietics e chei talians che a vevin cjatât sotet al ripâr De Gasperi, a vignirin tacâts bot e sclop di une sdrume di cosacs: trei partigjans cjargnei e trei rus a fòrin copâts; chei altris a rivarin a scjampâ e a tornàrin a Fors di Sôre. Tal meis di avrîl, tornât a organizâsi, il Bataion al tornà a vei la fuarce di 120 partigjans, rivant cussì infuartît, a partecipâ aes azions dai dîs da Liberazion, soredut al pas de Maurie e a Dimpeç. Tor la metât dal meis di mai dal 1945 i oms dal Stalin a vignirin clamâts jù prin a Fors di Sôre, e di culì a Tumieç là che ur fasèrin i onôrs militârs e preparade la lôr partence par l'URSS. Vè cemût che nus a descrit chel moment il comandant"Mario":"Il Bataion Stalin al è vignût ju a Tumieç da Fors di Sôre. Guidât da "Pizzi", al è il repart che cumò al cjape dentri ducj i rus, georgians e cosacs che in cualchi mût e tai svariâts moments, a àn scombatût tal 44/45 cu lis nestris formazions, in dut un150 di lôr, a son stâts pal moment sotetâts tun sôl ambient e si stan preparant a tornâ tes lôr patriis. A son stadis dadis disposizions precisis par che armis, divisis e documents a setin in sest. Par ognidun a è stade prontade une tessarute, par rus e par talian, dulà che al è scrit, in prionte dai dâts segnaletics principâi, il non dal repart, la date che a son jentrâts tal Stalin, e i combatiments là che a vevin partecipât. Lis tessarutis, firmadis dal comandant Alexej e dal comissari Silos, a son cuintrifirmâts di "Marco" e di me.
Chei dal Bataion si movin pôc par Tumieç. A son cjalâts di stuart da pluipart dai Tumiecins : di fat a someavin masse a di chei cosacs che ognidun ricuarde pe lôr violence e crudeltât. Il compuartament di ognidun di chei dal Stalin al è dut câs perfet: a son cussients de lôr situazion e a san che ducj ju cjàlin e ju contròlin. A ven le ore di partî: In place Rome, la buinore dal 14 di mai dal 1945, doi camions a spietin. I oms dal Bataion a montin su(cun lôr a son ancje dôs feminis cjargnelis maridadis cun dutis lis cjartis in regule cun doi oms dal Bataion). "Marco" e jo, cerclâts da altris comandants partigjans garibaldins i din l'ultim salût a chei dal "Stalin". O lei e po o consegni al comandant Alexej e al comissari Silos un salût da Division "Garibaldi-Carnia-Nassivera" là che si evidenzie il valôr dal repart rus e il sacrifizi patît tai luncs meis di vuere tal 44/45. Une strète di man e Alexej e Silos a saltin sul prin camion e a dan l'ordin di partî. O batin lis mans ai valorôs che s'in van. Mi stoi ingropant! O saludi oms che si son batûts fint al ultim cu la massime dedizion. Semenadis su pes monts da Cjargne e da Pedemontane, un centenâr di tombis a sègnin lis tapis dal lôr sacrifizi." (dal diari di "Barba Toni", Mario Candotti).
E di fat tal so discors, "Barba Toni" ,dopo vei ricuardât lis liendis plui impuartantis dal Bataion "Stalin"al diseve cussì: "Cumo che il Bataion "Stalin" al partis pe lontane Russie o sint il dovei di proferî al comandant Alexej, al comissari Silos e a ducj chei dal Bataion "Stalin" il gno salût plui ferbint e di sicuràur che nô partigjans da Cjargne no dismentearìn mai ce che lôr a àn fat pe nestre Patrie e che o zurin che lis tombis dulà che a pònsin i gloriôs muarts dal Bataion "Stalin" a saràn vegladis di nô come chês dai nestris fradis".
Tal 1970 l'ANPI provinciâl di Udin al presentà la domande pe concession de massime onorificenze militâr par Danijl Adveev, une domande che, dopo di un iter burocratic avonde lunc, a rivà in puart tal meis di novembar dal 1994, cuant che il President da Republiche Scalfaro al conferì une Medae d'Aur al valôr militâr a la memorie dal uficiâl sovietic Danijl Varfolomeevic Adveev, il "Comandant Daniel". La decorazion a la memorie i vignì dade cun cheste mutivazion:" ..." Uficiâl da cjavalarie sovietiche, scjampât a la depuartazion naziste e traviersade la Svuizare, a la guide di un trop di compatriots, dopo di une dure e periculose marce, al rivave tes prealps Cjargnèlis in Friûl. Culì al dave dongje intun sôl repart ducj i citadins sovietics scjampâts des presons nazistis e si meteve ai ordins dal comant Garibaldi dal Friûl, operant cun coragjo e sgimie cuintri dal nemî comun. Tal novembar dal 1944, dilunc vie de violente ofensive naziste su pes vals dal Tajament e dal Arzin, Danijl Avdveev Varfolomeic, con altris partigjans, cirint di fâ saltâ la strade par dulà che al passave il nemî, al vignì somerzût dal grant numar di militârs naziscj e dopo vei spindût dutis lis sôs fuarcis tune eroiche difese che a permetève ai soldâts talians di scjampâ, al colà vìtim tun at di eroîsim sublim, dant la sô zovine vite a la cause da liberazion da la Italie”. La medae a è stade consegnade dal ambassadôr talian a di une proniece dal "Comandant Daniel". Chest ricognossiment al ricuarde e al presente un dai moments plui impuartants( e forsit pôc cognossûts) da lote di liberazion in Friûl.
Intai ultims agns si è ancje savût da esistence , in Siberie, di cetancj parincj di "Daniel", fra chescj ancje la sûr Ane, aromai anzians e in condizions economichis no bielis. Cussì in diviers Comuns dal Friûl, massime tes zonis là che al veve operât il "Bataion Stalin", lis aministrazions comunâls a àn inviade une racuelte di bêz in favôr di ce che a reste da famèe di Danijl Adveev. A è stade cheste une azion umanitarie di clare significance e di une fuarte valence, tal ricuart e te laude da memorie di un combatent pe libertât. La storie des liendis di chei dîs lontans a è stade insiorade di gnovis pagjinis, cu la publicazion dal libri di Leonardo Picco "Tom"(Sorestant di Stât Majôr dal "Grup Brigadis Sud") Partigiani sovietici nella Val d'Arzino par cont da Sezion Anpi di Spilimberc e da monografie di Alberto Buvoli Comandante Daniel. Un ufficiale russo nella Resistenza friulana fate stampâ tal 2005 dal Comun di Pordenon.
Bibliografie
Alberto Buvoli, Comandante Daniel. Un ufficiale russo nella Resistenza friulana, Comun di Pordenon, 2005
Mario Candotti, Il battaglione "Stalin" , "Storia contemporanea in Friuli", n. 6, 1975
Mario Candotti, Ricordi di un uomo in divisa, Ifsml 1986
Leonardo Picco, Partigiani sovietici nella Valle d'Arzino, Sezion ANPI di Spilimberc, 2002
Pieri Stefanutti, Il Battaglione Stalin nella Valle del Lago, ciclostilât, 1986
Pieri Stefanutti, Daniel e i suoi compagni, Kappa Vu, 2023
Pieri Stefanutti, Quel russo che combatté assieme ai partigiani, "Messaggero Veneto", 29 di lui dal 1996
Fotografiis: Archivis Ifsml, Anpi e dal autôr
(Il test origjinâl al è stât voltât par cure di Remo Brunetti) |
