HAN ROBÂT COPÂT...

las veras pa PATRIA
no ses han tornadas
né i cancei
las ringhieras
(fintamai las filiadas)
seadas a or dal mûr
par ordin dal duce e dal re
par fâ l'IMPERO
né i cjaldîrs
las cogumas
las frisorias
e i cops di ram
puartâts vaint
e joduts a sbusâ
sgomberâ
trai 'tar un grum
su la plaza
pa VITTORIA
né las pioras
tratas four dal cjôt
dopo ve viert
a sdopetadas la puarta
e cuetas interias
dai nazi-cosacs
'tas cialderias dal formadi
par RAPPRESAGLIA
né las gjalinas
i purcits
las vacjas
requisidas (robadas)
dai nazi-todescs
e dai republichins nostrans
par fan e par fa dam
...cence contâ
i oms picjâts
torturâts depuartâts
i paîs brusâts
nissun s'impensie?
S'impensais però
dai partigjans:
"...han robât
copât..."
ma cui erino?

Gori, Carlo e Santina dal Negro
Min da Tea
Armando di Centa
Madio di agna Miuta
Tilio da Rigulat
i fîs di Esterina
Berto di Paschina
Cragnul Anastas di Zuviel
Barbacet Mario di Cjampiei
...
centenars e centenars
di cjargnei
miârs di fantats
la vuesta mularia
la nesta zoventût

A MAGRIN DA UN FRUT

ce ese il vivi la guera
par un frut
il vivi 'ta guera
par un frut
ch'al gjuia ai partigjans
cui aitis fruts
pai boscs
ce ese par un frut la muart
se non un vecju ingringinît
e zàl
denti una cassa ch'a
inclaudin
e la int ator ch'a vai
come s'a no capis
ch'a l'era massa vecju
ce ese la guera par un frut
se no il gjoc plui biel
che i grancj
- come dut -
fascin cence gust
né misura
ce ese la scuvierta da muart
par un frut
la muart di un om
no di un vecju
jodut tantas voltas a passâ
o crodût di jodilu -
cul sten e il fazzolet ros
par un frut ch'al rît
cjantant cui cosacs
las lor cjanzons
c h'a ur domanda curiôs
ce volel dî:
dobra e mamalika e somaliot
e fikifiki?
e a ur frea las cartatucjas
forsit no son nuia
ma parcé alora
chê voia di stâ e di cori
di vaî e di vosâ
apena sintût
da doi partigjans
saltats jù dai parafangos
di una baiila in corsa :
"Aulo l'è muart"?



CJALINA/DAVÂR 1945

Cjalina
doi di mai dal '45
a vevin za ont las ruedas dai
cjars
par partî

i garibaldins ju lumavin dai
prucs

la sera i cosacs
stracs
durmivin la lôr ultima not
prima di partî
e prima di finî a tocs
tra las mascerias e i telîârs in fôc

e l'indoman Davâr...

tra mascerias e fum
soldâts disperâts train
e ator fantaz dai nestris
cun qualchi sclopa
ma cence fazolet ros